Այս պահին առաջնահերթ խնդիր է Գոհար Ենոքյանի խափանման միջոցը փոխելը. Նաիրա Զոհրաբյան
Այս պահին առաջնահերթ խնդիր է «Բարգավաճ Հայաստան» խմբակցության նախկին պատգամավոր Գոհար Ենոքյանի խափանման միջոցը` կալանքը, րոպե առաջ փոխելը, ինչով էլ մի քանի գործընկերների հետ Ն. Զոհրաբյանը զբաղվելու է:
Այս մասին Tert.am-ի հետ զրուցում ասաց ԲՀԿ նախագահ Նաիրա Զոհրաբյանը, ով երեկ Էրեբունու ժամանակավոր պահման մեկուսարանում հանդիպել է Գոհար Ենոքյանի հետ:
«Տիկին Ենոքյանի առողջական վիճակն այնպիսի չէ, որ նա կարողանա մնալ մեկուսարանում և երեկ արդեն նրա մնալն իր մեջ լրջագույն խնդիր է պարունակում, որովհետև նա նոր է վիրահատություն տարել, ունի բարձր ճնշում»,- ասաց Նաիրա Զոհրաբյանը և ավելացրեց. «Երեկ զրուցել եմ իր հետ, իրեն մոտավորապես ներկայացվել է թե ինչի համար է գտնվում ձերբակալված անձանց ժամանակավոր պահման մեկուսարանում։ Տիկին Ենոքյանը, բնականաբար, մեղադրանքը համարում է կատարյալ աբսուրդ, դետեկտիվի վերջին ժանրից, բայց այս պահին հարցի իրավական կողմին չեմ անդրադառնա այնքան ժամանակ, քանի դեռ Հատուկ քննչական ծառայությունն իր տարբերակը չի ներկայացրել` հստակ պարզաբանմամբ»:
Հիշեցնենք, որ 73-ամյա Ենոքյանի փաստաբան Գեղամ Հակոբյանը «ՀԺ» թղթակցին հայտնել է, որ Ենոքյանը ձերբակալվել է ԱԺ պատգամավոր, նախկին ԲՀԿ-ական Կարո Կարապետյանի՝ Յուվեցի Կարոյի, սպանության նախապատրաստության կասկածանքով։
Նաիրա Զոհրաբյանը խորհուրդ է տալիս վարկածներ չքննարկել, քանի դեռ ՀՔԾ-ն հանդես չի եկել պաշտոնական հաղորդագրությամբ և նկատեց, որ ՀՔԾ-ն նման պարզաբանմամբ պետք է հանդես գար դեռ երեկ:
«Որովհետև ձերբակալվել է նախկին պատգամավոր, հանրային դեմք, և հանրությանը պետք է պատշաճ կերպով տեղեկացվեր, թե ինչու է 73-ամյա կնոջ նկատմամբ ընտրվում կալանքը՝ որպես խափանման միջոց, և այդ ինչ հանրային վտանգ կարող է ներկայացնել տիկին Ենոքյանը, և ինչպես կարող է խոչընդոտել նախաքննությանը»,- ասաց նա։
Ի պատասխան հարցի, թե Գոհար Ենոքյանը մնում է ԲՀԿ անդամ, Նաիրա Զոհրաբյանը հաստատական պատասխան տվեց և ավելացրեց. «Սակայն այստեղ որևէ կապ չունի կուսակցականությունը: Կրկնում եմ` երբ նախաքննական մարմինը պատշաճ ձևով կտեղեկացնի հանրությանը գործի մանրամասները, նոր կանդրադառնանք հարցի իրավական կողմին»:
Իսկ հարցին, թե կարծում է Գոհար Ենոքյանը, որ իր դեմ քաղաքական ինչ-որ բան է նախապատրաստվել, Նաիրա Զոհրաբյանը պատասխանեց, որ որևէ նման բան Գոհար Ենոքյանը իր հետ զրույցում չի ակնարկել:










