Թուրքիայի` ԵՏՄ-ով հետաքրքրված լինելու մասին Նազաբաևի ասածը պետք է դիտարկել որպես էկզոտիկա. քաղաքագետ

21:48 • 11.05.15

Ղազախստանի նախագահը մեկ անգամ չէ, որ հանդես է եկել էկզոտիկ հայտարություններով, հետևաբար այն, որ Թուրքիան հետաքրքրություն է ցուցաբերում ԵՏՄ-ի հանդեպ, դրանց շարքից  է և շուտով կարժանանա մոռացման: Tert.am –ի հետ զրույցում նման կարծիք հայտնեց  քաղաքագետ Ռուբեն Մեհրաբյանը` անդրադառնալով Ղազախստանի նախագահ Նուրսուլթան Նազարբաևի հայտարարությանը, որ  40 երկիր , այդ թվում`Թուրքիան,  ԵՏՄ  հանդեպ հետաքրքրություն են ցուցաբերում: 

 

«Նախ՝ Թուրքիան ԵՄ-ի հետ ունի ազատ առևտրի ռեժիմ,  ինչը դարձավ Թուրքիայի տնտեսական զարգացման գլխավոր գրավականը,  և Թուրքիան  երբեք այն չի վտանգի՝  հանուն ինչ-որ անհասկանալի գործընթացների»,-ասաց Ռուբեն Մեհրաբյանը` պատասխանելով հարցին, թե չնայած խորը վերապահումներին, որ Թուրքիան երբեևէ կանդամագրվի ԵՏՄ-ին, տեսական մակարդակով որքա՞ն հավանական է  Թուրքիայի անդամակցությունը ԵՏՄ-ին, և այդ պարագայում արդյո՞ք նպատակահարմար է Հայաստանի` այդ կառույցում մնալը:


Ռուբեն Մեհրաբյանը հավելեց, որ ո՛չ միայն Թուրքիայի պարագայում, այլև, առհասարակ, ԵՏՄ կառույցին պետք է մոտենալ վերապահումով, քանի որ այն, նրա խոսքով, ոչ թե ինտեգրացիոն կառույց է, այլ  փաստացի դեինտեգրացիոն:

 

«Չնայած  մակերեսի վրա կա ճտճտացող հռետորաբանություն, ինչ-որ տարբեր արարողություններ, հանդիպումներ, բայց իրականությունը հակառակն է: Այն դիկտատորների ակումբ է, իրենից ոչինչ չի ներկայացնում, միայն արգելակ է, խոչընդոտ, մի բանտ, որտեղից շատ արագ պետք է դուրս գալ»,-ասաց քաղաքագետը:


Ինչ վերաբերում է հարցին, թե Հայաստանի` ԵՏՄ-ին անդամակցության պայմանագրով  նախատեսվա՞ծ է  այս կառույցից պետությունների դուրս գալը, Ռուբեն Մեհրաբյանը նկատեց, որ թեպետ  նախատեսված է  ընթացակարգ, որով պետք է անդամ պետությունների համաձայնությունը, այնուամենայնիվ, այն ի սկզբանե քաղաքական որոշում է, որը  պետք է ներկայացվի  այդ երկրի ղեկավարի կողմից: