Բուրունդիի զինվորականները հայտնել են նախագահի տապալման մասին

17:18 • 13.05.15

Բուրունդիի զինվորականները հայտնել են երկրի նախագահ Պյեր Նկուրունզիզայի տապալման մասին, գրում է rg.ru-ն:

 

Ապրիլի 20-ից աշխարհի ամենաաղքատ երկիրը համարվող աֆրիկյան այս պետությունում թափ էին առել զանգվածային անկարգությունները:

 

Մայրաքաղաք Բուժումբուրայում ցուցարարների ամբոխն այրում է անվադողեր և կոտրում շենքերի ապակիները: Ոստիկանությունն արցունքաբեր գազ է կիրառում ցուցարարներին ցրելու համար:

 

Արդեն 20 մարդ է մահացել անկարգությունների ժամանակ: Համընդհանուր բողոքի պատճառը երկրի նախագահի որոշումն է՝ երրորդ անգամ զբաղեցնել նախագահի պաշտոնը՝ չնայած նրան, որ մի շարք միջազգային կառույցներ և ԱՄՆ-ն նրան կոչ էին արել դա չանել:

 

Բուրունդիի սահմանադրության համաձայն՝ երկրի նախագահը չի կարող գլխավորել իշխանությունը երրորդ անգամ անընդմեջ:

 

Բացի այդ, բնակչությունը դժգոհ է նրա կառավարումից և մեղադրում է նրան կոռուպցիայի համար։

 

Այժմ Արևելաաֆրիկյան միության ղեկավարները հավաքվել են Տանզանիայի մայրաքաղաքում, որպեսզի քննարկեն, թե ինչ միջոցներ է անհրաժեշտ ձեռնարկել պատերազմը կանխելու համար: