Չինաստանում ձերբակալել են պանդաների որսագողությամբ զբաղվող 10 անձի

17:01 • 13.05.15

Չինաստանում ձերբակալել են պանդաների որսագողությամբ զբաղվող 10 անձի, ովքեր սպանել են վերացման եզրին գտնվող կենդանիներին` նրանց մսի և մորթու համար, գրում է Daily Mail-ը:

 

CCTV-ի տվյալներով՝ 2014-ի դեկտեմբերին հայտնաբերվել էր պանդայի մորթի և 9,75 կգ պանդայի միս:

 

Ոստիկանությունը Յունան նահանգում ձերբակալել է երկու եղբայրների, ովքեր Ժաոտոն բնակավայրի մոտ գտնվող անտառում սպանել էին պանդայի, քանի որ ծայրահեղ աղքատության մեջ էին գտնվում:

 

Նրանք սպանել էին հասուն էգ պանդայի, ինչը չափազանց մեծ վնաս կարող է հասցնել առանց այդ էլ դժվարությամբ բազմացող կենդանիների թվաքանակին:

 

Ձերբակալվել են նաև սպանված պանդային ձեռք բերած և վերավաճառած անձինք:

 

Չինաստանի օրենքի համաձայն՝ վերացման եզրին գտնվող կենդանուն սպանելու համար սպառնում է մինչև 10 տարվա ազատազրկում:

 

Չինաստանում այժմ բնակվում է 1.864 պանդա: Մեծ պանդան հանդիսանում է Վայրի բնության համաշխարհային հիմնադրամի (WWF) խորհրդանիշը։