Բելառուսը դարձավ Եվրոպական բարձրագույն կրթական տարածքի անդամ

12:47 • 14.05.15

Երևանում մեկնարկած Եվրոպական բարձրագույն կրթական տարածքի (ԵԲԿՏ) Նախարարական գագաթաժողովի (ՆԳ) և Բոլոնիայի քաղաքականության չորրորդ ֆորումին հաստատվեց Բելառուսի անդամակցությունը Բոլոնյան գործընթացին:
 

Մինչ այդ Նիդերլանդների պատվիրակն անդրադարձավ Բելառուսի Հանրապետության անդամակցության հարցին՝ ընդգծելով, որ մեծամասնությունը կողմ է Բելառուսի անդամակցմանը, սակայն հստակ չէ, թե Բելառուսն ինչ պարտավորություններ է փորձում ստանձնել:

 

«Առաջարկում ենք հետաձգել Բելառուսի անդամակցությունը, որ անդամակցության հետ կապված հարցեր չմնան, ներառյալ պետական պարտավորություն ուսանողների ներգրավման հարցերը»,-ասաց նա:

 

Շվեդիայի պատվիրակն ընդգծեց, որ համաձայն է Հոլանդիայի հետ, և կարևոր է, որ իրենք զգան պատասխանատվություն Բելառուսի կողմից ակադեմիական ազատության ապահովման և ուսանողների ներգրավման հարցում:

 

«Մենք համաձայն ենք Բելառուսի անդամակցությանը, բայց կարևոր է ճանապարհային քարտեզը»,-ասաց նա:

 

ՀՀ կրթության և գիտության նախարար Արմեն Աշոտյանն առաջարկեց Բելառուսի անդամակցությունն ընդունել՝ հետագայում հետևելով ճանապարհային քարտեզի պահպանմանը:

 

«Բելառուսը վաղուց է դիմել անդամակցության համար, և երբեք այսքան մոտ չի եղել, որքան այսօր, ես համակարծիք եմ գործընկերներիս հետ, որ պետք է հետևենք բեռալուսական կողմի պարտավորությունների անցկացմանը»,-ասաց նա՝ շնորհավորելով Բելառուսին անդամակցության համար: