Թեժ վիճաբանություն ԱԺ-ում՝ Սեյրան Սարոյանի և Զարուհի Փոստանջյանի միջև
ԱԺ-ում այսօր 20 րոպեանոց ընդմիջումից հետո իսկական խառնաշփոթ սկսվեց: «Ժառանգություն» խմբակցության պատգամավոր Զարուհի Փոստանջյանի և հանրապետական պատգամավոր, գեներալ Սեյրան Սարոյանի միջև նիստերի դահլիճից դուրս սկսված վիճաբանությունը վերածվեց կռվի:
Սեյրան Սարոյանին համբերությունից հանել էր Զարուհի Փոստանջյանի կողմից պատգմավորներին բաժանվող ինչ-որ թղթեր, որը նախաձեռնություն էր՝ ընդդեմ Սյունիքի մարզպետ Սուրիկ Խաչատրյանի:
Գեներալ պատգամավորը Փոստանջյանի առաջարկին արձագանքեց վիրավորանքներով. «Էս ինչ ձևի կենդանի ա սա, հլը սրան նայեք, դու ոչ մի բանի հետ գործ չունես»:
Նա այլ վիրավորական խոսքեր ևս հղեց կին պատգամավորին և տպավորություն էր, թե հիմա վեճը կվերածվի ձեռնամարտի. միջամտեցին այլ պատգամավորներ՝ հեռացնելով Զարուհի Փոստանջյանին:
«Ես հիմա ոստիկանություն կդիմեմ»,-գոռում էր Զարուհի Փոստանջյանը:
ՀՀԿ-ական պատգամավորին չէր կարողանում հանգստացնել անգամ «Հանրապետական» խմբակցության ղեկավար Վահրամ Բաղդասարյանը, և Սարոյանը շարունակում էր գոռալ:
Նախագահող Հերմինե Նաղդալյանը խնդրում էր Սեյրան Սարոյանին տեղից չխոսել, սակայն Սարոյանի ձայնը դեռ լսելի էր, ում դժվարությամբ դուրս հանեցին նիստերի դահլիճից:










