Մեր ամենահավատարիմ դաշնակիցը Ռուսաստանն է. «Դեպի Եվրասիական միություն» շարժման անդամ
Մեր ամենահավատարիմ դաշնակիցը Ռուսաստանն է և ռուս ժողովուրդը: Այս մասին մամուլի ասուլիսին ասաց «Դեպի Եվրասիական միություն» շարժման անդամ, հասարակական - քաղաքական գործիչ Իշխան Թովմասյանը: Նա նշեց, որ դեռևս 95 թվականից այն համոզմունքին է, որ նորացված միության ստեղծման մեջ է մեր երեխաների ապագայի հարցը՝ անվտանգությունը:
«Մեր միակ արտաքին արդարացված, ճիշտ ուղին Ռուսաստանն է, իսկ ԵՏՄ ստեղծումը անհրաժեշտություն է»,- ասաց նա և նշեց, որ ավելին՝ նրանք նույնիսկ Սովետական Միության ստեղծման անհրաժեշտություն են տեսնում:
Ինչ վերաբերում է Ռուսաստանի հարաբերություններին՝ Թուրքիայի և Ադրբեջանի հետ, Իշխան Թովմասյանն ասաց.«Ռուսաստանն ում հետ ուզում է բարիդրացիական հարաբերություններ սկսի, համոզած եղեք, որ ռուս ժողովրդի համար առաջնայինը հայ ժողովուրդն է, ինչի ապացույցները շատ են եղել»:
Անդրադառնալով էլեկտրաէներգիայի հնարավոր թանկացմանը, նա ասաց, որ իրենք պահանջելու են ներկայացնել թանկացման հիմքերը և զարմանալի համարեց, որ էլեկտրաէներգիա արտադրող պետությունը քառակի անգամ թանկ է վաճառում այն իր երկրում:
Բացի այդ, նա նշեց, որ իրենք լուրջ նախապատրաստում են սահմանադրական փոփոխությունների գործընթացին, և խոստացավ, որ դրան ականատես կլինենք: «Սահմանադրությունում կամ սոցիալիստական Հայաստանի լավագույն դրույթները պետք է ամրագրվեն, կամ այդ Սահմանադրությունը ենթակա է դատապարտման»,- ասաց նա:










