«Իսլամական պետություն» խմբավորումը դեռահաս զինվորների մասնակցությամբ շքերթ է անցկացրել (լուսանկարներ, տեսանյութ)
Բաղդադին մոտ գտնվող Ռամադի քաղաքում «Իսլամական պետություն» ծայրահեղական խմբավորման զինյալները դեռահաս զինվորների մասնակցությամբ շքերթ են անցկացրել և հրապարակել են հնգամյա երեխայի լուսանկար՝ ականանետը ձեռքին, գրում է Daily Mail-ը։
Հրապարակված մեկ այլ լուսանկարում պատկերված է մեքենայի պատուհանից ժպտացող մի դեռահաս տղա՝ Կալաշնիկով հրազենը ձեռքին։
Կայքը նշում է, որ լուսանկարները հրապարակվել են ԻՊ-ի զինյալների կողմից՝ իրաքյան Ռամադի քաղաքը գրավելուց ժամեր անց։ Բացի մանկահասակ զինվորների լուսանկարներից, խմբավորման անդամները հրապարակել են նաև Ռամադի քաղաքի փողոցներում զոհերի մարմինների լուսանկարներ։
Ռամադի քաղաքը գտնվում է Բաղդադից 70 կմ հեռավորության վրա։
Մասնագետները մտավախություն ունեն, որ մայրաքաղաքին մոտ գտնվող Ռամադի քաղաքը գրավելուց հետո, զինյալների համար ավելի հեշտ կդառնա Բաղդադի վրա հարձակումներ գործելը՝ օգտագործելով իրաքյան բանակի՝ այդտեղ լքված զենքերը։
Տեսանյութում երևում են խմբավորման անդամների գործած ավերածությունները։


















