Համաշխարհային 5 բանկերի քրեական գործեր և տուգանքներ են սպասվում՝ արժույթի հետ մանիպուլյացիաներ անելու համար
Ինչպես սպասվում է՝ համաշխարհային 5 խոշոր բանկեր մեղավոր կճանաչվեն քրեական հանցագործության համար և կդատապարտվեն 5 միլիարդ դոլարը գերազանցող ընդհանուր տուգանքի՝ արժույթի շուկաներում խարդախության համար, հաղորդում է Reuters-ի ռուսական ծառայությունը:
Ամերիկյան JPMorgan և Citigroup բանկերը և բրիտանական Barclays և Royal Bank of Scotland-ը հավանաբար մեղավոր կճանաչվեն ԱՄՆ արդարադատության նախարարության առաջադրած քրեական մեղադրանքներով՝ արժութային շուկայում արած մանիպուլյացիաների առնչությամբ, հայտնում է գործակալությունը՝ վկայակոչելով իրավիճակին ծանոթ աղբյուրների:
JPMorgan-ը և Citigroup-ը կարող են դառնալ տասնամյակների ընթացքում առաջին ամերիկյան բանկերը, որոնք մեղավոր են ճանաչվել քրեական հանցագործության համար:
Barclays-ը, ինչպես սպասվում է, համաձայնությունների կհասնի բրիտանական և ամերիկյան կարգավորիչների հետ, ինչը նշանակում է, որ նրա տուգանքը կարող է լինել զգալիորեն ավելի շատ, քան մյուս բանկերի տուգանքները և կգերազանցի 2 միլիարդ դոլարը:
Իսկ շվեյցարական UBS բանկը կարող է խուսափել քրեական մեղադրանքից՝ իշխանություններին հնարավոր խնդրի մասին իրազեկելու համար։










