Չինաստանն առաջարկում է դեպի Վլադիվոստոկ երկաթգիծ կառուցել Հունչունի տարածքով

10:24 • 21.05.15

Չինաստանի Ցզիլին շրջանն առաջարկում է արագընթաց երկաթգիծ կառուցել դեպի Վլադիվոստոկ՝ Հունչունի տարածքով: Այդ նախագիծը չինական պատվիրակության ներկայացուցիչները ներկայացրել են Մերձծովյան երկրամասի նահանգապետ Վլադիմիր Միկլուշևսկու հետ հանդիպմանը, հաղորդում է ТАСС-ը:

 

«Մենք ունենք դեպի Վլադիվոստոկ արագընթաց երկաթուղային գիծ կառուցելու գաղափար: Մինչև օգոստոս մենք արդեն կաշխատեցնենք մինչև Հունչուն ընկած հատվածը: Եթե մեզ հաջողվի համատեղ այն երկարացնել, ապա այն կլինի Ռուսաստանի և Չինաստանի միջև առաջին արագընթաց ճանապարհը»,- հայտնել է Չինաստանի կոմունիստական կուսակցության Ցզիլինի շրջանային կոմիտեի առաջին քարտուղար Բաին Չաոլուն:

 

Չինական շրջանի պատվիրակությունը Մերձծովյան երկրամաս է ժամանել Խաղաղօվկիանոսյան զբոսաշրջային ֆորումին մասնակցելու նպատակով: