Սանտա Բարբարան աղետի գոտի է հայտարարվել՝ նավթի արտահոսքի պատճառով

09:23 • 21.05.15

Ամերիկյան Կալիֆոռնիայի նահանգապետ Ջերի Բրաունն աղետի գոտի է հայտարարել Սանտա Բարբարա շրջանը՝ պայմանավորված նավթի խոշոր արտահոսքով:

 

Ինչպես տեղեկացնում է ТАСС-ը, համապատասխան որոշումը կայացվել է նահանգի մայրաքաղաք Սակրամենտոյում:



«Այդ քայլը հնարավորություն կտա արտակարգ միջոցներ ձեռնարկել և կօգնի առկա ռեսուրսները մոբիլիզացնելուն: Մենք կանենք հնարավորը՝ Կալիֆոռնիայի ափերը պահպանելու համար»,-ասել է նա:

 

Երեքշաբթի ցերեկը հանգստավայրային Սանտա Բարբարա քաղաքից 34 կմ արևմուտք նավթատար խողովակ է վնասվել, ինչի հետևանքով նավթի զգալի քանակություն լցվել է ջուրը:

 

Նույն օրն արտահոսքը դադարեցվել է, և սկսվել են նավթը ջրից և ծովափից հավաքելու աշխատանքները:

 

Համաձայն երեկ ներկայացված տվյալների՝ նավթատար խողովակից թափվել է 2.5 հազար բարել հում նավթ:  Դրա զգալի մասը հայտնվել է ջրում:

 

Reuters գործակալության տվյալներով՝ այս արտահոսքը խոշորագույնն է վերջին 18 տարվա ընթացքում:


Այժմ երեք նավ է աշխատում դեպքի վայրում՝ փորձելով կանխել նավթի հոսքը դեպի Լոս Անջելես: