Տուսկն Ալիևի հետ քննարկել է «Արևելյան գործընկերության» շրջանակում նոր մոտեցումները
Եվրոպական խորհրդի նախագահ Դոնալդ Տուսկը հայտնել է, որ Ադրբեջանի նախագահ Իլհամ Ալիևի հետ հեռախոսով քննարկել է «Արևելյան գործընկերության» նոր գործիքների անհրաժեշտությունը, որոնք կարտահայտեին ԵՄ-ի տարբերակված մոտեցումը ծրագրի անդամ երկրների նկատմամբ, հաղորդում է ria.ru-ն:
«Մենք լիովին գիտակցում ենք, որ մեզ՝ ԵՄ-ին և «Արևելյան գործընկերությանը», հարկավոր են նոր գործիքներ: Դա եղել է նախագահ Ալիևի հետ մեր զրույցի հիմնական հարցը: Մենք չենք քննարկել հռչակագիրը»,- նշել է նա Ռիգայում գագաթաժողովի արդյունքներով մամուլի ասուլիսին:
Ինչպես ավելի վաղ հայտնել է Եվրախորհրդարանի ղեկավար Մարտին Շուլցը, Ադրբեջանը հրաժարվել է ստորագրել «Արևելյան գործընկերության» գագաթաժողովի վերջնական հռչակագիրը:
«Մենք ունենք համատեղ հռչակագիր, ներառյալ՝ Ադրբեջանը և Բելառուսը: Քննարկումն ավելի շուտ նոր գործիքների և նոր մոտեցումների մասին էր, որոնք կարտահայտեին տարբերակումը: Շարունակել համագործակցությունը ԵՄ-ի և Ադրբեջանի միջև՝ դա է եղել նախագահ Ալիևի ամենահստակ ուղերձը: Ադրբեջանին հարկավոր են Եվրոպայի հետ լավ հարաբերություններ, ես չեմ կասկածում դրան»,- նշել է Տուսկը:
Reuters-ի հաղորդմամբ` Դոնալդ Տուսկը զանգահարել է Ադրբեջանի նախագահին, ինչի պատճառով վերջնական մամուլի ասուլիսը մեկ ժամ հետաձգվել է: Գործակալությունը նշում է, որ ԵՄ պաշտոնյաների խոսքերով՝ դա արվել է համաձայնագրի տեքստում Լեռնային Ղարաբաղի հակամարտությանը վերաբերող տողի վերաբերյալ Ալիևի մտահոգությունները մեղմելու համար։
Տուսկը, մամուլի ասուլիսի ժամանակ անդրադառնալով այդ տարաձայնություններին, ասել է, որ զանգն ավելի շուտ այն մասին է եղել, թե ինչպես պետք է ԵՄ-ն «տարբերակված» մոտեցում ցուցաբերի նախկին խորհրդային երկրների հանդեպ, որոնք տարբեր շահեր ունեն ԵՄ-ի հետ համագործակցելիս:










