«Արևելյան գործընկերության» նպատակը այդ երկրները Ռուսաստանի ազդեցությունից պոկելն է. քաղաքագետ

22:29 • 22.05.15

«Արևելյան գործընկերություն» ծրագրի նպատակը մասնակիցներին՝ Հայաստանին, Վրաստանին, Մոլդովային, Ուկրաինային, Բելառուսին և Ադրբեջանին  Ռուսաստանի ազդեցությունից հեռացնելն է։ Այս մասին  Tert.am-ի հետ զրույցում ասաց քաղաքագետ Սերգեյ Շաքարյանցը՝ անդրադառնալով Ռիգայում այսօր անցկացված «Արևելյան գործընկերություն»  գագաթնաժողովին։ «Այդ ամենը միայն մի նպատակ ունի՝ պոկել այդ երկրները Ռուսաստանի ազդեցությունից, ինչն ի սկզբանե  մտածված է եղել»,-ասաց նա։

 

Ըստ քաղաքագետի՝  Եվրամիությունը երբեք հետաքրքրված չի եղել այս տարածաշրջանի երկրներով, և նրանց խնդիրը չի եղել՝ զարգացնել այդ երկրները։  


Նա նշեց, որ թեև Գերմանիայի կանցլեր Անգելա Մերկելը  Վրաստանի և Ուկրաինայի վերաբերյալ հայտարարել է, որ վիզային ռեժիմի հեշտացում ԵՄ-ի կողմից դեռևս անհնար է, սակայն դա վերաբերում է նաև մյուս երկրներին, ինչպես նաև՝ Հայաստանին։ Իսկ ինչ վերաբերում է  Լատվիայի արտգործնախարարի հայտարարությանը, թե ԵՄ-ն կարող է վերացնել վիզային ռեժիմը Հայաստանի համար, նա հարց բարձրացրեց, որ նույնիսկ վերացնելու դեպքում պետք է նայել, թե մեր բնակչության քանի տոկոսը կարող է մեկնել՝ հաշվի առնելով տոմսերի գները։



Սերգեյ Շաքարյանցը նշեց, որ Ռիգայի գագաթնաժողովից դեռ դրական արդյունքներ չկան։