Կոնգրեսի մոտ վայրէջք կատարած փոստատարն իրեն անմեղ է համարում

09:43 • 22.05.15

Ամերիկացի Դագ Հյուզը, որն ապրիլին փոքր ուղղաթիռով վայրէջք էր կատարել Վաշինգտոնում Կապիտոլիումի մոտ, դատարանում հայտարարել է իր անմեղության մասին:
 

Ինչպես տեղեկացնում է РИА Новости գործակալությունը, մեկ տեղանոց ուղղաթիռը՝ ԱՄՆ-ի փոստային ծառայության նշանով, վայրէջք էր կատարել Կոնգրեսի գլխավոր շինության մոտ:


61-ամյա օդաչու Դագ Հյուզը ձերբակալվել էր: Հաղորդվել էր, որ տղամարդը մտադիր է եղել Կոնգրեսի բոլոր անդամներին նամակներ հասցնել իշխանությունների կոռումպացվածության մասին:

 

Հյուզին մեղադրանք է առաջադրվել 6 կետով,  ներառյալ՝ չգրանցված թռչող սարք վարելն ու հակաօդային պաշտպանության արգելված գոտի մտնելը: Նրան 9 տարվա ազատազրկում է սպառնում:


Ձերբակալման պահին Հյուզի մոտ հայտնաբերվել էր ավելի քան 500 նամակ՝ յուրաքանչյուր կոնգրեսականի համար:

 

«Իմ նպատակն էր Կոնգրեսին դրդել աշխատել ժողովրդի, այլ ոչ մոնոպոլիայի համար»,- հայտարարել է նա դատարանում: