Անելու ենք ամեն ինչ՝ հարցը արդար ավարտին հասցնելու ու մեղավորին պատժելու համար. Ս. Օհանյանը՝ կուրսանտի սպանության մասին
Այսօր ՀՀ պաշտպանության նախարար Սեյրան Օհանյանից լրագրողները հետաքրքրվեցին՝ Վազգեն Սարգսյանի անվան ռազմական ինստիտուտում հունվարի 29-ին տեղի ունեցած սպանության գործի ընթացքից:
Նախարարը նշեց, թե նախարարությունն իր կողմից իրականացված միջոցառումներն ամբողջությամբ ավարտել է: «Մենք համապատասխան կադրային փոփոխություններ ենք իրականցրել, նշանակումները կատարվել են ԶՈւ ամենաբանիմաց սպաների կողմից և նաև շարունակական կերպով թերությունների վերացման ուղղությամբ աշխատանքներ ենք իրականացնում»,- ասաց նախարարը:
Հիշեցնենք, որ հունվարի 29-ին ռազմական ինստիտուտի կուրսանտ Հայկազ Բարսեղյանը վաղ առավոտյան հայտնաբերվել էր մարզահրապարակում` պտտաձողի վրա պարանով կախված վիճակում: Նրա սպանության մեջ մեղադրվում է 4 զինծառայող՝ Գնել Թևոսյանը, Նորիկ Սահակյանը, Վաչե Սահակյանը, Մովսես Ազարյանը: Նրանց մեղադրանք է առաջադրվել ՀՀ քրեական օրենսգրքի 104-րդ հոդվածի 2-րդ մասի 7-րդ և 10-րդ կետերով՝ մի խումբ անձանց կողմից խուլիգանական դրդումներով սպանություն:
Սեյրան Օհանյանի խոսքով՝ հիմնական գործընթացն իրավական դաշտում է: «Անընդհատ համագործակցում ենք իրավական ոլորտի հետ և անելու ենք ամեն ինչ՝ հարցը վերջանական և արդար ավարտին հասցնելու համար, և այն մարդիկ, որ իրականացրել են՝ պատժվելու են»,- ասաց նա:
Նախարարը հավատացրեց, որ անձամբ հետևողական է լինելու, որպեսզի մեղավորները պատիժը կրեն:
«Ես մեր իրավական ոլորտի գործընկերներին հարց եմ տվել, որ որևէ խոչընդոտող հանգամանք կա՞, որևիցե մեկը փորձե՞լ է կողքից ազդեցություն ունենալ. ո՛չ ՊՆ-ից, ո՛չ մեր պետության որևէ կառույցներից որևէ մեկը չի փորձել մտնել այս խնդրի մեջ, և ես ինքս հետևողական եմ լինելու, որպեսզի պատիժը ստանան այդ խախտումն իրականացրածները»,-ասաց նա:
Հիշեցնենք, որ Հայկազ Բարսեղյանի ծնողները մտահոգություն են հայտնել, թե ռազմական ինստիտուտի նախկին փոխտնօրենը, ում որդին այս սպանության գործով ձերբակալված է, փորձում է իր լծակներն ու կապերը գործի դնելով՝ ճնշում գործադրել նախաքննության վրա:










