Դինքի գործով թուրքական հետախուզական ծառայության պաշտոնյա է ձերբակալվել

12:47 • 29.05.15

«Ակօս» թերթի գլխավոր խմբագիր Հրանտ Դինքի սպանության գործով Ստամբուլի ահաբեկչության և կազմակերպված հանցավորության դեմ պայքարի վարչության կողմից շարունակվող քննության շրջանակում ձերբակալվել է սպանության շրջանում Ստամբուլի հետախուզության բաժնի պետերից Ալի Ֆուաթ Յըլմազերը։

 

Ինչպես տեղեկացնում է «Հուրրիյեթը», Յըլմազերն արդեն ցուցմունք է տվել։

 

Դատարանը նրան «հանցագործություն իրականացնելու համար խմբավորում ձևավորելու», «կանխամտածված սպանությանն օժանդակելու» մեղադրանքներով կալանավորելու որոշում է կայացրել։

 

Յըլմազերի ձերբակալությամբ Դինքի սպանության գործի վերաքննության արդյունքում ձերբակալվածների թիվը հասավ 5-ի։

 

Դինքը սպանվել է 2007 թվականի հունվարի 19-ին։