«Ջահուկյանական ընթերցումներ». միջազգային գիտաժողով Երևանում

12:27 • 03.06.15

Այսօր ՀՀ Գիտությունների ազգային ակադեմիայում տեղի ունեցավ «Ջահուկյանական ընթերցումներ» միջազգային գիտաժողովի լիագումար նիստը: Այն նվիրված է բանասեր, լեզվաբան, հայագետ ՀՀ ԳԱԱ ակադեմիկոս Գևորգ Ջահուկյանի 95-ամյա հոբելյանին:


Աճառյանի անվան լեզվի ինստիտուտի տնօրեն Վիկտոր Կատվալյանը լրագրողների հետ զրույցում ասաց, որ առաջին «Ջահուկյանական ընթերցումներ» գիտաժողովը տեղի է ունեցել  2006 թվականին՝ Գիտությունների Ակադեմիայի թղթակից անդամ Լավրենտի Հովհաննիսյանի նախաձեռնությամբ:
 

«Այնուհետև գիտաժողովը մեծ համարում է ձեռք բերել լեզվաբանների շրջանում:  Ամեն տարի գիտաժողովին հնչել են 30-40 զեկուցումներ, որոնցում արծարծել են արդի լեզբավաբանությանը հուզող խնդիրներ, առաջարկվել են լուծումներ, եղել են քննարկումներ»,-ասաց նա և նշեց, որ նախորդ տարի գիտաժողովը դարձավ միջազգային և  9 երկրներից մասնակիցներ ներկա գտնվեցին, իսկ այս տարի ներկա են 3 երկրի ներկայացուցիչներ: Նա նշեց, որ դրսի ներկայացուցիչների գալ կամ չգալը ֆինանսական հարցերով է պայմանավորված:

 


Նա ասաց, որ Գևորգ Ջահուկյանը հայ լեզվաբանությանը բերել է միջազգային ճանաչում: «Թվում է՝ միշտ նա մեզ հետ է, միշտ մեզ ղեկավարում է իր բարի հիշատակով»,-ասաց նա:


ԳԱԱ ղեկավար Ռադիկ Մարտիրոսյանն իր բացման խոսքում «Ջահուկյանական ընթերցումների» կազմակերպումը լավ ավանդույթ համարեց, որը լեզվի ինստիտուտը տարիներ անընդմեջ իրականացնում է՝ հրավիրելով միազգային տարբեր երկրների լեզվաբաններին:


Նա նշեց, որ հումանիտար գիտությունների ոլորտում դժվար է միջազգային բարձր մակարդակ ունենալ: «Ջահուկյանը կարողացավ հումանիտար գիտությունը բարձրացնել և միջազգային բարձր մակարդակի հասցրեց»,-ասաց նա:


Ռադիկ Մարտիրոսյանը նշեց, որ Ջահուկյանը շատ հետաքրքիր մարդ էր, սիրում էր անկեդոտներ  պատմել և ամեն հանդիպելիս մի նոր անեկդոտ էր պատմում:


Առաջին զեկուցող Լիանա Հովսեփյանը ներկայացրեց Ջահուկյանի կյանքը և գործը: Նա նշեց, որ Ջահուկյանի աշխատանքը տարիների ընթացքում ոչ թե խամրել է, այլ հակառակը՝ ավելի  արժևորվել: Նա նշեց, որ Ջահուկյանը այն  բացառիկ հետազոտողներից է, որ աչքի է ընկնում իր խորությամբ և նրա աշխատությունները ելակետ են դարձել հետագա լեզվաբանների համար:
 

«Ջահուկյանի գաղափարներն ընդունված  են և լեզվաբանության մեջ գտել են իրենց  շարունակողները»,-ասաց նա: