80-ամյա չինացին համալրել է «Իսլամական պետության» գրոհայինների շարքերը (լուսանկարներ)

11:21 • 05.06.15

Իրաքի և Սիրիայի տարածքում իր վտանգավոր գործունեությունն իրականացնող «Իսլամական պետություն» ահաբեկչական խմբավորումը համալրվել է 80-ամյա անդամով, ով, ըստ ամենայնի, խմբավորման ամենատարեց ջիհադիստն է:

 

Ինչպես նշում է dailymail.co.uk-ը, հայտնի է, որ Մուհամեդ Ամին անունով տարեց չինացին ընտանիքի հետ լքել է հայրենիքը ու միացել իսլամիստներին: Աղբյուրը մանրամասնում է, որ ծերուկն այդպիսի որոշում է կայացրել, երբ իմացել է, որ ընդդիմադիրների շարքերում կռվող իր որդին սպանվել է Սիրիայի պատերազմական գործողությունների ժամանակ:

 

Նշվում է, որ Ամինը պատկանում է Չինաստանի հյուսիսում բնակվող մուսուլման ույղուրների փոքրամասնությանը: Հայտնի է, որ հայրենիքում Ամինն իմամ է եղել, ու, իր խոսքով, «ճնշումների ենթարկվել երկրի իշխանությունների կողմից»:

 

«Ես իմ կամքով եմ միացել «Իսլամական պետությանը» ու մարզվում եմ հատուկ ճամբարում: Անկախ տարիքիցս՝ մասնակցում եմ բոլոր վարժանքներին, ու շուտով պետք  է զենք ստանամ»,-ասել է նա։