ՀՀ 32 համայնքներում այսօր ՏԻՄ ընտրություններ են անցկացվում
Հայաստանի հինգ մարզերի (Արագածոտն, Կոտայք, Շիրակ, Արմավիր , Տավուշ) 32 համայնքներում այսօր տեղական ինքնակառավարման մարմինների ընտրություններ են անցկացվում:
Հունիսի 7-ին 32 համայնքներից 20-ում ընտրվելու են համայնքի ղեկավարներ, 12-ում՝ ավագանու անդամներ, իսկ երկուսում կլինեն և՛ համայնքի ղեկավարի, և՛ ավագանու անդամի ընտրություններ:
Թեկնածուների գերակշիռ մասը կա՛մ հանրապետականներն են, կա՛մ վայելում են նրանց աջակցությունը: Միակ բացառությունը «Բարգավաճ Հայաստան»-ի երկու անդամներն են և մեկ դաշնակցականը:
Ամենաթեժ պայքարը սպասվում է Աբովյանում անցկացվող քաղաքապետի արտահերթ ընտրություններին, որտեղ օրինակ` «Երկրապահ կամավորականների միությունը» առաջադրված 5 թեկնածուներից երկուսին էլ սատարում է. ԵԿՄ մարզային կառույցը սատարում է ՀՀԿ–ի և «Բարգավաճ Հայաստան»-ի աջակցությունը վայելող Վահագն Գևորգյանին, Աբովյանի կառույցը՝ ՀՀԿ-ի շարքերից հեռացված Արթուր Հարությունյանին:
Քաղաքապետ կընտրեն նաև Արտաշատում, որտեղ գրանցված միակ թեկնածուն վարչապետ Հովիկ Աբրահամյանի որդին է՝ Արգամ Աբրահամյանը:
Ալավերդիում առաջադրված թեկնածուները երկուսն են՝ «Հարավկովկասյան երկաթուղիներ» ՓԲԸ-ի Սանահինի մեքենայացված գծային ուղեմասի պետ Կարեն Փարեմուզյանը, ում առաջադրել է Հանրապետական կուսակցությունը և Արթուր Աբգարյանը, ով «Սթրոնգ սթոուն գրուպ» ընկերության տնօրենն է:










