Ինտերպոլը սառեցրել է ՖԻՖԱ-ի հետ 20 մլն դոլարի համաձայնագիրը
Ինտերպոլը դադարեցրել է 2011 թվականին ՖԻՖԱ-ի հետ համատեղ ընդունած 20 միլիոն դոլարի նախագծի գործողությունը: Ինտերպոլի կարծիքով՝ ֆուտբոլային ասոցիացիան չի կիսում դրա հիմնարար արժեքները և սկզբունքները, հաղորդում է BBC-ի ռուսական ծառայությունը:
«Սպորտային արդարություն» ծրագրի սառեցումը հաջորդել է կոռուպցիոն սկանդալին և կոռուպցիայի համար կասկածվող ՖԻՖԱ-ի բարձրաստիճան պաշտոնյաների ձերբակալություններին:
Նախնական պլանի համաձայն՝ երկու միջազգային կազմակերպությունների համատեղ նախագիծը պետք է հակազդեր քրեական խմբավորումների հովանավորության տակ գտնվող անօրինական տոտալիզատորներին և սպորտային մրցումների հետ կապված խարդախություններին:
Ֆուտբոլային ասոցիացիաների միջազգային ֆեդերացիայի շուրջ ներկայիս սկանդալը բացահայտվել է մայիսի 27-ին, երբ շվեյցարացի ոստիկանները Ցյուրիխի հյուրանոցներից մեկում ձերբակալեցին կազմակերպության յոթ բարձրաստիճան պաշտոնյայի:










