Իտալիայում բացահայտել են թափոնների՝ Եվրոպայի ամենամեծ ապօրինի աղբավայրը (տեսանյութ)
Իտալիայում մի լրագրող բացահայտել է թափոնների՝ Եվրոպայի ամենամեծ ապօրինի աղբավայրը, որն անհանգստացրել է նաև շրջակա միջավայրի պահպանությամբ զբաղվող ոստիկանությանը, գրում է euronews.com-ը։
Այն այնքան ահռելի է, որ համեմատության համար նշվում է 30 ֆուտբոլի մարզադաշտի ընդհանուր չափը։
«Մենք հայտնաբերեցինք թաղված թափոններից դուրս եկող հրավտանգ հեղուկներ, ապա սկսեցինք փորել այդ հատվածները և գտանք վտանգավոր թափոններ։ Կարծում եմ՝ թափոնների հետ հանցագործները որոշել են այդպես վարվել, քանի որ շինարարական աղբը և լուրջ վտանգ ներկայացնող թափոնները վերամշակելն ավելի թանկ է, քան պարզապես դրանք թաղելը»,- ասել է շրջակա միջավայրի պահպանությամբ զբաղվող ոստիկանության բաժանմունքի աշխատակից Սերջիո Կոստան։
Լրագրող Սալվատորե Մինիերին սկսել է հարցաքննել տեղի բնակիչներին և համեմատել է 1960-ականներին արված տեղանքի լուսանկարներն անօդաչուներով արված լուսանկարների հետ։
Արդյունքում՝ պարզվել է, որ անհասկանալի բլրակներ են առաջացել, իսկ տեղի բուսական աշխարհն ու ընդհանուր միջավայրը մեծ փոփոխությունների են ենթարկվել` հողը դարձնելով մանուշակագույն և կապույտ գույնով ներկված։
Մաֆիայի անդամ Կարմինե Շիավոնեն հայտնել է, որ շուրջ 20 տարի մասնակցություն է ունեցել այդտեղ թափոններ տեղափոխելու գործին և մեծ գումարներ է աշխատել ապօրինի աղբավայրի բիզնեսից։










