Բրիտանացին կատուների վանդակներով հերոին տեղափոխելու համար դատապարտվել է 7 տարվա ազատազրկման
Բրիտանացի Սքոթ Փարքերը կատուներին օգտագործել է հերոինի շուրջ 2 մլն դոլար արժողությամբ չափաբաժինն օդային ճանապարհով ապօրինի տեղափոխելու համար, գրում է mirror.com-ը։
Լոնդոնի դատարանը նրան դատապարտել է 7 տարվա ազատազրկման։ 43-ամյա Փարքերն աշխատել է օդային ճանապարհով կենդանիների տեղափոխմամբ զբաղվող ընկերությունում։
Նա ձերբակալվել է «Հիթրոու» օդանավակայանում՝ կատուների վանդակները ստանալու պահին։
Ոստիկանները հայտնաբերել են, որ կատուների վանդակներում թաքցված է եղել ընդհանուր առմամբ 9 կգ մաքուր հերոին, որի արժեքը շուկայական գնով 1.2 մլն ֆունտ ստերլինգ է (մոտ 1.9 մլն դոլար)։
Թմրանյութերն առգրավվել են, իսկ կենդանիներին վերադարձրել են իրենց տերերին։










