Վարշավայի օդանավակայանում հաքերային հարձակման պատճառով չվերթները չեղյալ են հայտարարվել
Ավելի քան 1.400 ուղևոր չի կարողացել կիրակի օրը թռչել Վարշավայի միջազգային օդանավակայանից լեհական LOT ավիափոխադրող ընկերության համակարգչային ցանցի վրա հաքերների հարձակման պատճառով, հաղորդում է BBC-ի ռուսական ծառայությունը:
Ավիաընկերության տասը ներքին և միջազգային չվերթ, այդ թվում՝ Դյուսելդորֆ, Համբուրգ և Կոպենհագեն ուղղություններով, չեղյալ է հայտարարվել, ևս 12 չվերթ հետաձգվել է:
Հաքերների գործողությունների հետևանքով, ինչպես հստակեցրել են ավիաընկերությունում, Ֆրեդերիկ Շոպենի անվան օդանավակայանում ուղևորների գրանցման համար պատասխանատու համակարգի անսարքություն է գրանցվել:
Ավիափոխադրողն ընդգծում է, որ օդում ուղևորների անվտանգության համար վտանգ չկա:
Հաքերային հարձակման հետևանքները վերացնելու համար պահանջվել է մոտ հինգ ժամ: Համակարգչային հարձակման հանգամանքները հետաքննվում են։










