Եվրոգոտու երկրների առաջնորդները կիրակի օրը Հունաստանի հարցով շտապ հանդիպում կանցկացնեն

11:02 • 08.07.15

Reuters

 

Եվրոգոտու երկրների առաջնորդները որոշել են կիրակի օրը հավաքվել նոր շտապ գագաթաժողովի անցկացման համար, որպեսզի վերջնականորեն որոշեն Հունաստանի ճակատագիրը, նրանք, ընդ որում, դեֆոլտից երկիրը փրկելու հնարավորությունը և եվրոգոտում դրա անդամակցության պահպանումը հոռետեսորեն են գնահատում, գրում է Interfax.ru-ն։

 

«Դաժան իրականությունն այն է, որ մենք հինգ օր ունենք վերջնական համաձայնության հասնելու համար: Եթե մենք չկարողանանք գալ համաձայնության, դա կարող է բերել Հունաստանի սնանկության և իր բանկային համակարգի փլուզման»,- ասել է Եվրախորհրդի նախագահ Դոնալդ Տուսկը:

 

Եվրոգոտու երկրների առաջնորդների հանդիպումը երեքշաբթի կայացել էր լարված մթնոլորտում: Գործընկերները մեղադրում են Հունաստանի վարչապետ Ալեքսիս Ցիպրասին ողջ եվրոպական տարածաշրջանում լարվածության սրման, հունական տնտեսությունը փրկելու ուղղությամբ եվրոպացի հարկատուների ջանքերը գնահատելու ցանկության բացակայության, փոխադարձ վստահությունը տապալելու համար: