Հայ տղամարդիկ չեն թողնում, որ hայ աղջիկները ծառայեն բանակում. Սեյրան Օհանյան

15:31 • 24.07.15

ՀՀ պաշտպանության նախարար Սերյան Օհանյանը այսօր «Արի տուն» ծրագրի շրջանակներում Հայաստան ժամանած երիտասարդների հետ հանդիպման ժամանակ անդրադառնալով զորակոչի թեմային ասաց, որ հայ տղամարդիկ չեն թողնում, որ hայ աղջիկները ծառայեն բանակում:

 

Չնայած դրան՝ նա նշեց, որ կան աղջիկներ, որոնք ծառայում են՝ ոչ միան բժշկական, կապի համակարգերում, այլ նաև հատուկ ստորաբաժանումներում, և ներկայում հայկական զինուժում կան լավ պատրաստված դիպուկահարներ:

 

Նախարարը հայտնեց, որ արդեն երեք աղջիկ Ռազմական բարձրագույն հաստատություն են ավարտել, տասնմեկն այժմ սովորում, նրանց մեծ մասը Տավուշի մարզից են:

 

«Հայ տղամարդիկ մի քիչ էլ ճիշտ են մտածում»,- ասաց նա և նշեց, որ որքան արագ հաղթահարվեն առկա դեմոգրաֆիկ խնդիրները, այնքան երկիրը հզոր կլինի։
 

Նախարարը նշեց, որ իրենք աշխատանքներ են տանում, որպեսզի բանակը ժամանակակից զենք ունենա, սակայն նույնիսկ լավագույն զենքը կիրառողը հայ զինվորն է:

 


«Եթե այսօր գնահատելու լինենք բանակի ամենազորեղ մասը, դա մարդն է, մարտական ոգին է»,- ասաց նա և նկատեց, որ հայ ժողովուրդը քիչ զենքով կարողացել է կռվել և հասնել հաջողությունների:

 

Նրա գնահատմամբ՝ 2014 թվականը եղել է ձեռքբերումների և դիրքերի ամրապնդման տարի: