«Մենք ենք տերը մեր երկրի» նախաձեռնությունն ի պաշտպանություն Սյուզի Գևորգյանի հավաք-երթ է անցկացրել
Ազատության հրապարակում «Մենք ենք տերը մեր երկրի» երիտասարդական նախաձեռնության մի խումբ անդամներ այսօր դատապարտող հավաք-երթ անցկացրին՝ ի պաշտպանություն մոսկվայաբնակ 23-ամյա Սյուզի Գևորգյանի։
Նշենք, որ Երևանում օգոստոսի 13-ի երեկոյան անհայտ անձինք հարձակվել էին «Հիմնադիր խորհրդարանի» աջակից Սյուզի Գևորգյանի վրա, հարվածներ հասցրել նրան և սպառնացել այն բանի համար, որ նա վերջին օրերին զբաղված է եղել Համահայկական խաղերին մասնակցող սփյուռքահայ երիտասարդների շրջանում քարոզչական աշխատանք իրականացնելով և թռուցիկներ բաժանելով:
Tert.am-ի հետ զրույցում Սյուզի Գևորգյանը նշեց, որ ենթադրում է, որ դրանք ոստիկաններ են եղել։
«Ես ուզում եմ վերադառնալ Հայաստան և ապրել ազատ ու անկախ Հայաստանում: Ես պայքարում եմ ու կոչ եմ անում մեր հայրենակից մյուս երիտասարդներին էլ ոտքի կանգնել և պայքարել մեր օր օրի դատարկվող Հայաստանի համար, որովհետև կարծում եմ՝ ամեն հայ պետք է դա գիտակցի»,-ասաց նա։
Երիտասարդ աղջիկը նշեց, թե չնայած սպառնալիքներին՝ ինքը չի վախեցել: «Հավատացե՛ք վախ չկա, և դեպքից հետո էլ ես բաժանել եմ թռուցիկները և ամեն օր էլ բաժանում եմ ու չեմ էլ պատրաստվում իմ քայլերից հետ կանգնել»,-ասաց նա:
Սյուզի Գևորգյանը նշեց, որ իրավապահներին չի դիմել և մտադրություն էլ չունի դիմելու։
«Որովհետև մենք բարձրաձայնել ենք այս բռնության մասին, և կարծում ենք, որ իրենք տեղյակ են և պետք է ընդունեին որպես հանցագործության մասին հաղորդում և արձագանքեին»,-ասաց նա:
Ի դեպ, երիտասարդ ակտիվիստին աջակցելու էին եկել նաև «Կանանց ճակատ» կոչվող կազմակերպության անդամները, ովքեր ևս հայտարարեցին, որ ի պաշտպանություն Սյուզի Գևորգյանի՝ իրենք այսօր երեկոյան ժամը 20:00-ին ֆլեշմոբ կանցկացնեն Հյուսիսային պողոտայում:
Սյուզի Գևորգյանը նշեց, որ 2 տարեկանից բնակվում է ՌԴ Կրասնոդարի երկրամասում, սակայն ամեն տարի գալիս է Հայստան: Այժմ նա այնտեղ սովորում է պետական համալսարանի իրավաբանության ֆակուլտետում։













