Աֆղանստանում ավելի քան 300 աշակերտ հիվանդանոց է տեղափոխվել գազի թունավորման հետևանքով
Աֆղանստանում մեկ շաբաթվա ընթացքում տեղի հիվանդանոցներ են տեղափոխվել ավելի քան 300 դպրոցականներ՝ անհայտ գազի թունավորման հետևանքով, հաղորդում է interfax.ru-ն։
Ոստիկանությունը կասկածում է, որ դեպքերն անհայտ անձանց չարամտության հետևանք են։
Հինգշաբթի օրը երկրի հյուսիս-արևմուտքում գտնվող Գերատ քաղաքում 115 աղջիկ է հոսպիտալացվել այն բանից հետո, երբ թունավորվել է անորոշ գազից, հայտարարել է շրջանային հիվանդանոցի ներկայացուցիչ Մոհամեդ Ռաֆիկ Շերզայը։
Նրա խոսքով՝ նրանց տարիքն 9-18 է:
Շերզայը նշել է, որ դա արդեն նման երրորդ դեպքն է այս շաբաթվա ընթացքում նույն քաղաքում:
Չորեքշաբթի օրը նույն դպրոցում թունավորվել է 68 աղջիկ:
Երկուշաբթի օրը 140 աշակերտուհի է հոսպիտալացվել մեկ այլ դպրոցից:
Տեղի իշխանությունները կարծում են, որ թունավորման բոլոր դեպքերը կանխամտածված են եղել: Ենթադրվում է, որ դրա հետևում կանգնած են իսլամիստները, որոնք խոչընդոտում են կրթություն ստանալու կանանց բոլոր փորձերը։










