Մաքսանենգները սոցցանցերի միջոցով օգնում են ԵՄ հասնել ցանկացող ներգաղթյալներին
Շատ ներգաղթյալներ, որոնք թաքնվում են Մերձավոր Արևելքում պատերազմից, օգտագործում են սոցիալական ցանցերը մաքսանենգներ որոնելու համար, որոնք օգնում են նրանց Եվրոպա հասնելու հարցում, գրում է РИА Новости-ն։
Սոցցանցերի միջոցով ներգաղթյալները Եվրոպա բարեհաջող հասած մարդկանցից ստանում են կոորդինատներն ու տեղեկատվությունը: Facebook-ի օգնությամբ փախստականներին համակարգում են Սիրիայից մեկնելուց առաջ: Այդ մասին ասել է Սիրիացի փախստականների օգնության ասոցիացիայի ղեկավար Մուհամեդ Սալի Ալին։
Հաղորդվում է, որ Facebook սոցիալական ցանցում ստեղծվում են արաբերենով խմբեր, որտեղ մասնակիցներն իրենց կոնտակտներն են թողնում և առաջարկում են Թուրքիայից մեկնել Հունաստան: Այդ խմբերում նաև տարածվում է տեղեկություն այն մասին, թե ինչպես հատել Հունգարիայի և Սերբիայի սահմանը, Թուրքիայից Գերմանիա տեղափոխման գինը և շատ այլ տեղեկություններ:
«Մենք տեղեկություններ ենք ստանում գործակալությունների, գների, կաշառքների, հեռախոսների մասին, բոլոր մանրամասները»,- ասել է փախստականներից մեկը Բելգրադում:
Նման սոցիալական գործիքների թվում են նաև WhatsApp և Viber մեսենջերները, որոնցով ներգաղթյալները կապվում են մաքսանենգների հետ, կապ պահպանում ընտանիքի և ընկերների հետ: Դրանց միջոցով նրանք կարող են նաև գտնել ճանապարհորդության համար անհրաժեշտ ողջ տեղեկատվությունը՝ գներ, կաշառք...
«Մենք օգտագործում ենք սոցիալական ցանցերը, ներառյալ՝ WhatsApp-ը, Viber-ը և Facebook-ը, մարդկանց հետ կապ պահելու համար: Եթե նրանք արդեն Արևմտյան Եվրոպայում են, նրանք մեզ ուղարկում են տեղեկատվություն, որպեսզի օգնեն մեզ կազմել ուղեգիծը… Մենք օգտագործում ենք մեր սմարթֆոնները հիմնականում GPS-նավիգացիայի համար, որպեսզի չկորենք»,- ասել է սիրիացի փախստական Ահմադը Բուդապեշտի կայարանում:










