Մենք դատապարտում ենք անմեղ քաղաքացիների միտումնավոր թիրախավորումը. Ջեյմս Ուորլիք

09:37 • 05.09.15

ԵԱՀԿ Մինսկի խմբի ամերիկացի համանախագահ Ջեյմս Ուորլիքը Twitter սոցցանցի իր միկրոբլոգում հերթական գրառումն է արել՝ վերջին օրերին հայ- ադրբեջանական սահմանին և շփման գծում իրավիճակի սրման առնչությամբ։

 

«Մենք դատապարտում ենք ԼՂ հակամարտության շրջանակում անմեղ քաղաքացիների միտումնավոր թիրախավորումը: Մենք հակամարտությունը բանակցային ճանապարհով լուծելու տարբերակի կողմնակից ենք»,- գրել է համանախագահը։

 

Ինչպես ավելի վաղ հայտնել էր Tert.am-ը, իր նախորդ թվիթերյան գրառման մեջ Ուորլիքը տարածել էր արկի բեկորի լուսանկար։

 

«Սա 120 միլիմետրանոց ականանետի արկ է, որը, ըստ տեղեկությունների, օգտագործվել է Ղարաբաղյան հակամարտության ընթացքում։ Նման սրումն անընդունելի է»,- գրել էր Ուորլիքը։

 

Հիշեցնենք, որ այդ և այլ լուսանկարներ ավելի վաղ տարածել էր ԼՂՀ ՊՆ-ն։

«Վերջին շրջանում հակառակորդը սկսել է հաճախակի կիրառել խոշոր տրամաչափի հրաձգային և հրթիռահրետանային զինատեսակներ, ինչն ադրբեջանական քարոզչությունն անհաջողությամբ փորձում է հերքել: Որպես ասվածի վկայություն` ստորև ներկայացնում ենք ադրբեջանական առաջապահ ուժերի կողմից կիրառված նշված զինատեսակների լուսանկարային ապացույցները»,– ասվում էր ԼՂՀ ՊՆ հաղորդագրությունում։