Չինաստանում սկուտերից ընկած թոշակառուն մահացել է՝ անցորդների անտարբերության պատճառով (տեսանյութ, լուսանկարներ)
Չինաստանի կենտրոնական Հենան շրջանում 60-ամյա թոշակառուն հորդառատ անձրևներից առաջացած հեղեղումների պատճառով ընկել է սկուտերից ու քիչ անց մահացել՝ անցորդների անտարբերության պատճառով, գրում է The Daily Mail-ը:
Տղամարդն ընկել է սկուտերից ուղիղ ջրի մեջ և չի կարողացել բարձրանալ: Անցորդներից ոչ ոք, սակայն, չի փորձել փրկել նրան:
Երբ նրան 3 րոպե անց վերջապես հանել են ջրից, նա արդեն մահացած է եղել։
Նշվում է, որ սկուտերն ընկել է տղամարդու վրա, և նա ջրում փորձել է դուրս գալ դրա տակից։ Մարդկանց մի խումբ մոտեցել է նրան, սակայն այնուհետ հեռացել: Նշվում է, որ մի կին խնդրել է տղամարդկանց օգնել, բայց նրանցից ոչ ոք չի ցանկացել օգնություն ցուցաբերել:
Լրատվամիջոցը գրում է, որ Չինաստանում վերջին տարիներին ավելանում է պատահարների մեջ հայտնված ծերերի մասնակցությամբ խարդախությունների թիվը: Նրանց թիրախում բարեհոգի անծանոթներն են, ովքեր գալիս են նրանց օգնելու: «Վիրավոր» թոշակառուներն այնուհետև մեղադրում են իրենց օգնած մարդկանց իրենց վնաս հասցնելու համար և փորձում դատական կարգով գումար կորզել նրանցից: Շատերը կարողացել են խուսափել խարդախություններից տեսահսկման համակարգերի կամ ականատեսների օգնությամբ: Այնուամենայնիվ, հայտնի չէ, թե արդյոք այս միջադեպում դա է եղել պատճառը, որ մարդիկ օգնություն չեն տրամադրել տարեց մարդուն:















