Հունգարիայի փոխարեն փախստականներն ուղևորվել են Խորվաթիա. հունգարական հեռուստաալիք

09:06 • 16.09.15

Լուսանկարը՝ Reuters-ի

 

Հունգարիայի փոխարեն, որը խստացրել է իր սահմանների պահպանությունը, փախստականները Սերբիայի տարածքով շարժվել են դեպի Խորվաթիա, հայտնում է Корреспондент-ը՝ հղում անելով հունգարական M1 ալիքին։

 

«Մոտ տասնյակ ավտոբուսներ Սերբիայի տարածքով շարժվում են դեպի Շիդ քաղաք՝ Խորվաթիայի հետ սահմանին։ Նրանց վարորդներն իշխանություններից հանձնարարություն են ստացել շարժվել առանց կանգառների»,- հայտնում է հեռուստաալիքը։

 

Ինչպես կարձագանքեն դրան խորվաթական իշխանությունները՝ դեռ հայտնի չէ։ Մինչդեռ Սերբիայի և Հունգարիայի սահմանին սերբական կողմից կուտակվել է մոտ 3.000 փախստական, ովքեր սպառնում են ճեղքել պատը։

 

Հիշեցնենք, որ սեպտեմբերի 15-ին Հունգարիայում ուժի մեջ են մտել նոր օրենքներ, որոնք խստացնում են սահմանային հսկողությունը և այն ապօրինի հատելու համար պատիժը։ Այժմ սահմանի անօրինական հատումը համարվում է քրեական հանցագործություն։