Գերագույն խորհրդի պատգամավորները Անկախության տոնի առթիվ հավաքվում են 25 տարի անց

14:04 • 19.09.15

Հայաստանի հանրապետության անկախացումից հետո ձևավորված առաջին  օրենսդիր մարմնի` ՀՀ առաջին  Գերագույն խորհրդի պատգամավորների նախաձեռնությամբ այսօր Մելիք Ադամյան փողոցում գտնվող կառավարության նիստերի դահլիճում կկայանա ընդունելություն:

Այս մասին Tert.am-ի հետ զրույցում տեղեկացրեց   Ազգային ժողովի «Հանրապետական» խմբակցության պատգամավոր Խոսրով Հարությունյանը` նշելով.  «Սա զուտ նախկին Գերագույն խորհրդի պատգամավորների նախաձեռնությունն է, ինձ անձամբ հրավիրել են, այլ մանրամասների ծանոթ չեմ»:


ՀՀ առաջին գումարման Գերագույն խորհուրդն իր աշխատանքները սկսել է 1990թ. հուլիսի 20-ին և ավարտել 1995թ. մայիսի 15-ին: Այդ ընթացքում ընդունվել է 1169 որոշում և 185 օրենք, որոնցից 104-ը` մայր, իսկ 81-ը` փոփոխություններ և լրացումներ գործող օրենքներում:  Վավերացվել է 148 միջազգային պայմանագիր: Հենց ՀՀ Գերագույն խորհրդի գործունեության օրոք, ավելի կոնկրետ՝ 1995թ. հուլիսի 5-ին է ընդունվել ՀՀ Սահմանադրությունը:


Նշենք, որ ՀՀ  առաջին  Գերագույն խորհուրդը կազմավորված էր մեծամասնական ընտրակարգով և  բաղկացած էր 260 պատգամավորից:  


Նշենք, որ 5-րդ գումարման ԱԺ-ում ներկայացված պատգամավորներից ՀՀ առաջին Գերագույն խորհրդի պատգամավորներ են «Հայ  ազգային կոնգրես» խմբակցության անդամներ   Արամ Մանուկյանը, Հրանտ Բագրատյանը, ՀՀԿ խմբակցությունից`  Խոսրով Հարությունյանը,  Հայկ Բաբուխանյանը, «Ժառանգություն» խմբակցության այլևս նախկին ղեկավար Ռուբեն Հակոբյանը:


Իսկ  առհասարակ ՀՀ  Գերագույն խորհրդի պատգամավորներ են եղել ՀՀ ոստիկանապետ Վլադիմիր Գասպարյանը,   Սահմանադրական դատարանի նախագահ Գագիկ Հարությունյանը, ՀՀ առաջին նախագահ Լևոն Տեր-Պետրոսյանը,  Բաբկեն Արարքցյանը,  Հանրային խորհրդի նախագահ Վազգեն Մանուկյանը, Վանո Սիրադեղյանը, անվանի հայ լեզվաբան Ռաֆայել Իշխանյանը և այլք:


Խոսրով Հարությունյանը, հետադարձ հայացքով գնահատելով անցած ճանապարհը, նշեց, որ,   բոլոր դեպքերում, 5-րդ գումարման ԱԺ-ում ավելի հասունացած քաղաքական գործիչներ են հավաքվել:


«Ըստ որում, հասունացել ենք բոլորս` հանրությունն ամբողջությամբ և քաղաքական էլիտան` նմանապես: Մեր մոտեցումներն այն ժամանակ շատ  ավելի  պարզունակ էին, իսկ քաղաքական զարգացումները շատ սաղմնային վիճակում էին: Մենք  շատ օրենքներ ընդունում էինք կոնցեպտուալ, սկզբունքային հենքի վրա` մանրամասներ, դետալներ չէինք ամրագրում, որովհետև դրանք չէինք էլ պատկերացնում»,-  գնահատեց Խոսրով հարությունյանը: