Չինաստանում հարսնացուն ընդմիջել է իր հարսանիքը՝ ջրում խեղդվող մարդուն փրկելու համար (լուսանկարներ)
Երիտասարդ աղջիկն «ամենագեղեցիկ հարսնացուն» է անվանվել չինական լրատվամիջոցներում այն բանից հետո, երբ փորձել է փրկել ջրում խեղդվող մարդու կյանքը, գրում է The Daily Mail-ը։
25-ամյա Գուո Յուանյուանն իր հարսանեկան ֆոտոշարքի համար լուսանկարվելիս է եղել Չինաստանի հյուսիս-արևելքում գտնվող Դալիան քաղաքի ծովափում, երբ լսել է, որ մի տղամարդ է խեղդվում։ Նա շտապել է դեպքի վայր և փորձել է վերակենդանացնել նրան: Դժբախտաբար, չնայած նրա ջանքերին, տղամարդը մահացել է։
Ականատեսների խոսքերով՝ նրանք նկատել են ծովում ձեռքը թափահարող և օգնություն կանչող տղամարդու: Մի քանի հոգի կարողացել են լողալով հասնել նրան և ափ դուրս բերել, սակայն տղամարդն արդեն անգիտակից է եղել։
Ականատեսներից մեկի խոսքով՝ նա հավանաբար սրտի կաթված է ստացել: Ներկաներից ոչ մեկ, սակայն, չի իմացել՝ ինչպես է պետք օգնություն ցուցաբերել տղամարդուն:
Գուո Յուանյուանը, ով տարածքի հիվանդանոցներից մեկում բուժքույր է աշխատում, լուսանկարվելիս է եղել նույն լողափում։ Առանց մտածելու՝ նա շտապել է դեպքի վայր։ Նա մոտ 20 րոպե փորձել է վերակենդանացնել տղամարդուն, բայց, դժբախտաբար, անզոր է եղել փրկել տղամարդու կյանքը։















