Սրբալույս Մյուռոնի օրհնություն՝ Մայր Աթոռ Սուրբ Էջմիածնում

18:26 • 27.09.15

Մայր Աթոռ Սուրբ Էջմիածնում այսօր տեղի ունեցավ Սրբալույս Մյուռոնի օրհնության արարողությունը, որին մասնակցում էին ՀՀ բարձրաստիճան պաշտոնյաներ, Ամենայն Հայոց Կաթողիկոսը։ Ներկա էր Հանրապետության նախագահ Սերժ Սարգսյանը, Ազգային ժողովի նախագահ Գալուստ Սահակյանը, վարչապետ Հովիկ Աբրահամյանը, կառավարության ներկայացուցիչներ, դեսպաններ, և այլք։

Մյուռոնօրհնության բացառիկ իրավունքը վերապահված է Ամենայն Հայոց Կաթողիկոսին: Այժմ մյուռոն է օրհնում նաև Մեծի Տանն Կիլիկիո Կաթողիկոսն իր մի քանի թեմերի համար: Ըստ ձևավորված սովորության` մյուռոնն օրհնվում է 5-7 տարին մեկ։ Ս. Մյուռոնի պատրաստությունը սկսվում է Մյուռոնօրհնությունից ամիսներ առաջ, երբ աշխարհի զանազան վայրերից Մայր Աթոռ են բերվում անհրաժեշտ բոլոր նյութերը։ Դրանք են՝  ձիթենու յուղը և բալասանը, որոնց խառնվում է 40-ից ավել տարբեր հոտավետ խունկերի, ծաղիկների, անուշահոտ բույսերի արմատների, ծաղկաջրերի, յուղային հյութերի և տերևների միաշաղախված հեղուկը:

Բոլոր նյութերը աղոթքների ներքո լցվեցին Ս. Մյուռոնի կաթսայի մեջ, որից հետո հնչեց «Հայր մեր»-ը։

Ապա ելույթ ունեցավ Ն.Ս.Օ.Տ.Տ. Գարեգին Բ Ամենայն Հայոց Կաթողիկոսը, ով հայտարարեց, որ այս տարվա արարողությունը նվիրված է Հայոց Ցեղասպանության 100-րդ տարելիցին։ «Սրբալույս Մյուռոնը տեսանելի նշանն է Քրիստոսով օծման, որն ընդունում ենք մկրտության միջոցով՝ իբրև ժառանգակից փրկչի: Մյուռոնով զգեստավորվում ենք Քրիստոսի սրբությամբ, մաքրվում մեղքից, որպեսզի ապրենք Աստծո արդարությամբ: Մյուռոնը զարթոնք և գարուն է հոգիների, ծաղկում՝ հավատքի, առաքինասեր կյանքի ու բարեպաշտ գործերի, վահան՝ ընդդեմ չարի, հաղթանակը, փառքն ու լուսեպսակը հավատացյալների, քանզի Երկնավոր մեր Հայրը Իր Որդու միջոցով, կոչեց մեզ մահվանից կյանքի, մեղքին ծառայությունից շնորհների ազատության և երկնային արքայության ժառանգության»,-ասաց Ամենայն Հայոց Կաթողիկոսը:

Վեհափառ Հայրապետը շեշտեց՝ Սուրբ Մյուռոնն իր զորությամբ  հավատքի զենք հանդիսացավ Հայոց Ցեղասպանությանը զոհ դարձած ժողովրդի զավակների համար. «100-ամյա մեր ուղին եղավ վերածննդի ուղի, և այսօր մեր անկախ պետականության հովանու ներքո ազգային զարթոնքի նոր հորիզոններ են լուսավորվում»։

Նա ասաց, որ Ցեղասպանության 100-րդ տարելիցի նվիրական տարում մյուռոնը կոչում ենք «Հաղթության մյուռոն»։