Հարցեր, որոնց պետք է պատասխանի ՀԷՑ-ը. հանրային քննարկում

12:23 • 29.09.15

Այսօր «Գործընկերություն հանուն բաց հասարակության» նախաձեռնությունը (ԳՀԲՀ), որը ներկայացնում է քաղաքացիական հասարակության 60-ից ավել կազմակերպություններ, կազմակերպել էր հանրային քննարկում «Ի՞նչ հարցերի պետք է պատասխանի «Հայաստանի էլեկտրական ցանցեր» ՓԲԸ-ում իրականացվելիք աուդիտը: Ներկա իրավիճակը» խորագրով: Թեև քննարկմանը հրավիրված էին պատկան մարմիններից տարբեր պաշտոնյաներ, սակայն վարող Դավիթ Ամիրյանն ասաց, որ նրանք տարբեր պատճառաբանություններով չէին ներկայացել:


Անկախ փորձագետ, տնտեսագետ  Արտակ Մանուկյանն իր ելույթում ներկայացրեց իրենց կողմից առաջարկությունների փաստաթուղթը, որով կոչ է արվում իրականացնել ՀԷՑ-ի կողմից իրականացված գնումների ուսումնասիրություն, ներքին վերահսկողության համակարգի առկայության ուսումնասիրություն, ծախսային սահմանաչափերի առկայություն և դրա համատեքստում օգտագործման չափաքանակների գնահատում,  կառավարման արդյունավետության ուսումնասիրություն, տարածքների վարձակալության հիմնավորվածության և նպատակահարմարության ուսումնասիրություն, ցերեկային և գիշերային սակագների խզվածության հիմնավորվածության գնահատում, ներդրումների արդյունավետության գնահատում, արտադրող կայաններին հզորությունների դիմաց վճարումների մոտեցումների ուսումնասիրություն, իրականացնել խոշոր սպառողների հետ հարաբերությունների ուսումնասիրություն,  ակտիվների վերագնահատման մասով ռիսկերի ուսումնասիրություն, նյութական ծախսերի հիմնավորվածության ուսումնասիրություն, և ծախսերի օպտիմալացման և ռացիոնալացման մասով առաջարկների ներկայացում:

 


«Ես երբևէ դեմ չեմ բնական մենաշնորհներին, մեկ սուբյեկտի առկայությանը, խնդիրն այն չէ, որ մեկ սուբյեկտի ենք  տվել, ես խնդիրը տեսնում եմ բարձիթողի վիճակի մեջ, կանոնակարգման մեխանիզմների բացակայությունն է խնդիրը»,- ասաց նա: