American Apparel-ը սնանկության մասին դիմում է ներկայացրել

11:08 • 05.10.15

American Apparel հագուստի ռիթեյլերը երկուշաբթի օրը սնանկության մասին փաստաթղթեր է ներկայացրել, գրում է interfax.ru-ն։

 

Վերջին շրջանում ընկերությունը բախվել է մի շարք դժվարությունների՝ խոշոր պարտքեր, վաճառքների անկում և ընկերության հիմնադիր Դով Չարնիի հետ դատական քաշքշուկներ։

 

Առաջին կիսամյակում ընկերության կորուստը կազմել է 45 միլիոն դոլար, այս տարվա երկրորդ եռամսյակում եկամուտն ընկել է 17 տոկոսով: Վերջին ժամանակներում ընկերությունը կորցրել է 340 միլիոն դոլար: Բացի այդ, մինչև հոկտեմբերի 15-ն ընկերությունը պետք է վճարեր 13,9 միլիոն դոլար պարտք։

 

Նշվում է, որ ԱՄՆ-ում շատ ռիթեյլերներ ճնշում են զգում բարձր մրցակցությունից և սպառողական ծախսերի թույլ աճից։ Հատկապես շատ են վնաս կրել երիտասարդական հագուստի բրենդները։ Վերջին տարվա ընթացքում սնանկացել են այնպիսի ընկերություններ, ինչպիսիք են Wet Seal-ը, Deb Shops-ը, Delia’s-ը և Body Central-ը։