ԱՄՆ-ում ստուգում են հատուկ ծառայությունների՝ Ռուսաստանի հետ կապված հնարավոր սխալները. Reuters

15:08 • 08.10.15

ԱՄՆ Կոնգրեսի երկու պալատների հետախուզության հարցերով հանձնաժողովները ներքին հետաքննություն են սկսել՝ նպատակ ունենալով պարզել հնարավոր սխալները, որոնք թույլ են տվել հատուկ ծառայությունները Սիրիայում և ավելի վաղ Ղրիմում Ռուսաստանի մտադրությունները գնահատելու ժամանակ։ Այդ մասին հինգշաբթի օրը հայտնել է Reuters գործակալությունը՝ վկայակոչելով Կոնգրեսում և ԱՄՆ վարչակազմում ունեցած իր աղբյուրներին։

 

Աղբյուրների համաձայն՝ կոնգրեսականները ցանկանում են պարզել, թե որքանով են սխալվել հատուկ ծառայությունները տարբեր ազդանշանները գնահատելիս: Այն ժամանակից ի վեր, երբ Ուկրաինայի շուրջ հակամարտություն սկսվեց, ԱՄՆ հատուկ ծառայությունները փորձում են կրկին ակտիվացնել Ռուսաստանի վերաբերյալ տեղեկատվության հավաքագրումը, սակայն նրանց չեն բավարարում ռեսուրսներն այն պատճառով, որ նրանց գործում հիմնական աշխատանքը տարվում է Մերձավոր Արևելքում, Աֆղանստանում և Պակիստանում ահաբեկչությանը հակազդելու ուղղությամբ։

 

Գործակալության զրուցակիցները փաստում են, որ ԱՄՆ վարչակազմն անակնկալի է եկել Սիրիայում Մոսկվայի գործողությունների արագընթացությունից և ագրեսիվությունից։ «Հատուկ ծառայությունները տեսնում էին, որ ինչ-որ բան է նախապատրաստվում, սակայն նրանք թերագնահատել են մասշտաբները»,- խոստովանել է աղբյուրներից մեկը։