ՀՀ վարչապետը պատրաստակամություն է հայտնել աջակցելու ԵՏՄ-Իրան երկխոսության ձևավորմանը և համագործակցության խորացմանը

20:44 • 14.10.15

Հայաստանի վարչապետ Հովիկ Աբրահամյանի և Իրանի Իսլամական Հանրապետության առաջին փոխնախագահի Էսհաղ Ջահանգիրիի հանդիպման ընթացքում կողմերն անդրադարձել են ճանապարհային ենթակառուցվածքների ծրագրերին, մասնավորապես «Հյուսիս-Հարավ» ճանապարհային միջանցքի ներդրումային ծրագրին և Հայաստան-Իրան երկաթգծի նախագծին:


«Երկուստեք կարևորել ենք դրանց առանցքային դերը տարածաշրջանային փոխգործակցության բարելավման և միջանցքի երկայնքով տնտեսական աճի ապահովման հարցում»,-հանդիպումից հետո լրագրողների հետ հանդիպման ընթացքում ասաց վարչապետ Հովիկ Աբրահամյանը:


Նա տեղեկացրեց, որ հատուկ ընդգծվեց հայ-իրանական միջկառավարական հանձնաժողովի գործունեության կարևորությունը և կանոնավոր հանդիպումների անհրաժեշտությունը, որը երկու երկրների առևտրատնտեսական հարաբերությունների փոխշահավետ զարգացման լավագույն միջոցն է:


Հանդիպման ընթացքում շոշափվել են նաև Եվրասիական տնտեսական միություն-Իրան հարաբերություններին առնչվող հարցերը. «Հայաստանի Հանրապետության կառավարության անունից պատրաստակամություն հայտնեցի աջակցելու ԵՏՄ-Իրան երկխոսության ձևավորմանը և համագործակցության խորացմանը, մասնավորապես՝ ԵՏՄ-Իրան ազատ առևտրի նախապատրաստվող համաձայնագրի կնքման համատեքստում»,- նշեց վարչապետը: