Cathay Pacific-ը դադարեցրել է Կասպից ծովի վրայով թռիչքները՝ ռուսական հրթիռների պատճառով

10:31 • 14.10.15

Հոնկոնգյան ամենախոշոր Cathay Pacific ավիաընկերությունը դադարեցրել է Իրանի և Կասպից ծովի վրայով թռիչքները՝ Սիրիայում իսլամիստների դիրքերին ուղղված ռուսական թևավոր հրթիռների հարվածների պատճառով, գրում է lenta.ru-ն։

 

Նշվում է, որ ավիաընկերությունը հետևել է Ավիացիոն անվտանգության եվրոպական գործակալության նախազգուշացմանը, որն ավելի վաղ հայտնել էր, որ հրթիռների հարվածները վտանգ են ներկայացնում ուղևորատար ինքնաթիռների համար։

 

Տարածաշրջանի վրայով թռիչքները դադարեցվել են հոկտեմբերի 8-ից: Մասնավորապես՝ Հռոմ ուղղությամբ չվերթներն այժմ իրականացվում են Հյուսիսային Չինաստանով և Մոսկվայով, մինչդեռ նախկինում ճանապարհն անցնում էր Կասպից ծովի վրայով։

 

Ավիաընկերությունում հաստատել են թռիչքների դադարեցման փաստը և հայտարարել, որ ուսումնասիրում են ստեղծված իրավիճակը։

 

Նշվում է, որ նոր հրիթռների հարվածների դեպքում Cathay Pacific-ի օրինակին կարող են հետևել ևս մի շարք ավիաընկերություններ, ներառյալ՝ Air France-ը։

 

Հոկտեմբերի 12-ին Ավիացիոն անվտանգության եվրոպական գործակալությունը նախազգուշացրել է Իրանի, Իրաքի և Կասպից ծովի վրայով թռիչքների վտանգի մասին։ Գործակալությունը որևէ առաջարկներ չի արել։