Ասանժին խնդրում են թույլ տալ հիվանդանոց գնալ՝ հետազոտության
Էկվադորի արտաքին գործերի նախարար Ռիկարդո Պատինյոն հայտարարել է, որ WikiLeaks սկանդալային կայքի հիմնադիր Ջուլիան Ասանժին անհրաժեշտ է ապահով միջանցք տրամադրել հիվանդանոց հասնելու համար, գրում է korrespondent.net-ը՝ վկայակոչելով ԱԳՆ-ի մամուլի ծառայությանը։
Պատինյոն պատմել է, որ արդեն երեք տարի Լոնդոնում Էկվադորի դեսպանատանն ապրող Ասանժը բժշկական օգնության կարիք ունի։
Բժիշկների խոսքերով՝ ավստրալացին մագնիսա-ռեզոնանսային տոմոգրաֆիայի կարիք ունի աջ ուսի ցավերի պատճառը հասկանալու համար։
Էկվադորի ԱԳՆ-ում կարծում են, որ Մեծ Բրիտանիան պետք է Ասանժին հիվանդանոց այցելելու հնարավորություն ընձեռի։
Հիշեցնենք, որ Շվեդիայի դատախազությունը WikiLeaks-ի հիմնադիր Ջուլիան Ասանժին ներկայացված սեռական բնույթի հանցագործությունների կատարման չորս մեղադրանքներից երկուսը չեղարկել է։










