Հարձակման ենթարկված Քյոլնի քաղաքապետի թեկնածուն հաղթել է ընտրություններում
Գերմանական Քյոլն քաղաքի քաղաքապետի թեկնածու Հենրիետա Ռեկերը, ում վրա շաբաթ օրը նախընտրական արշավի ժամանակ հարձակում են գործել, հաղթել է քաղաքապետի ընտրություններում, գրում է BBC-ի ռուսական ծառայությունը։
Հենրիետա Ռեկերի օգտին քվեարկել է ընտրողների 52,7 տոկոսը։
Հարձակումից հետո Ռեկերը դեռ հիվանդանոցում է գտնվում։ Բժիշկները նրա վիճակը լուրջ, բայց կայուն են գնահատում։
Քաղաքապետի թեկնածուի վրա հարձակումը տեղի էր ունեցել շաբաթ օրը: Ռեկերի վրա էր հարձակվել դանակով զինված մի տղամարդ: Նա լուրջ վնասվածք է ստացել պարանոցի շրջանում և հոսպիտալացվել է: Վնասվածքներ են ստացել ևս չորս մարդ, որոնք փորձել են կանգնեցնել հարձակվողին։
Հարձակումը կարող էր «ռասիստական քաղաքական շարժառիթ» ունենալ, հայտարարել է շրջանային ոստիկանության ղեկավար Վոլֆգանգ Ալբերսը։ Ռեկերը գլխավորում է Քյոլնի կառավարությունում սոցիալական հարցերի և ինտեգրման բաժինը, և նրա պատասխանատվության տակ է գտնվում քաղաք ժամանող փախստականների բնակեցման հարցը։
Հարձակվող տղամարդը ձերբակալվել է: Ինչպես հայտնել են քննիչները, կասկածյալը 44-ամյա Քյոլնի բնակիչ է, որն արդեն մի քանի տարի գործազուրկ է: Ենթադրվում է, որ տղամարդը հարձակումը կատարել է օտարերկրացիների նկատմամբ ատելության պատճառով։










