Ասադի՝ Մոսկվա այցից հետո Էրդողանը զանգահարել է Պուտինին
Թուրքիայի նախագահ Ռեջեփ Թայիփ Էրդողանն ու ՌԴ նախագահ Վլադիմիր Պուտինն այսօր հեռախոսազրույց են ունեցել։
Ինչպես տեղեկացնում է Milliyet-ը, Պուտինն Էրդողանին տեղեկություններ է հաղորդել Սիրիայի նախագահ Բաշար ալ-Ասադի՝ Մոսկվա կատարած այցի մասին։
Թուրքիայի նախագահական աշխատակազմի աղբյուրների փոխանցմամբ՝ Էրդողանը Պուտինին հայտնել է իր մտահոգությունները Սիրիայում տեղի ունեցող վերջին իրադարձությունների առնչությամբ:
Նա նշել է, որ Հալեպի և դրա շրջակայքի վրա իրականացվող հարձակումները կարող են փախստականների նոր ալիքի պատճառ դառնալ։
Հեռախոսազրույցի ընթացքում Էրդողանը նաև նշել է, որ Սիրիայի քրդերը կապ ունեն Թուրքիայում արգելված PKK-ի հետ, իսկ Թուրքիան պայքար է մղում ինչպես ԻՊ-ի, այնպես էլ մյուս խմբավորումների դեմ։
Երկու առաջնորդները պայմանավորվել են այս հարցերն ավելի մանրամասնորեն քննարկել հաջորդ ամիս պլանավորված G-20 գագաթաժողովի շրջանակներում:










