Պատժի կրումից ազատված Սողոմոն Քոչարյանը գարեջուր է ուզել, որն ասոցացնում է ազատության հետ, բայց չի կարողացել խմել

17:30 • 22.10.15

 

«Սուրբ Գրիգոր Լուսավորիչ» հիվանդանոցում գտնվող ցմահ դատապարտված  Սողոմոն Քոչարյանը, ով այսօր ծանր հիվանդության  պատճառով դատարանի որոշմամբ ազատվեց պատժի կրումից,  «Անմեղության հայկական ծրագիր» հասարակական կազմակերպության նախագահ Զարուհի Մեժլումյանից խնդրել է գարեջուր, թեպետ առողջական պատճառներով չի կարողացել այն խմել:
 

Tert.am-ին այս մասին հայտնած Զարուհի Մեժլումյանը, ով հիվանդանոցում Սողոմոն Քոչարյանի քույրերի հետ միասին սպասում էր այս մասին ՔԿՀ տեղեկանքին, մանրամասնեց. «Գարեջուրն իր համար ասոցացվում է ազատության հետ, որովհետև ինքը իմ հետ հարցազրույցների մեկի ժամանակ պատմել էր, որ Մհեր Ենոքյանի հետ փախուստի ժամանակ (երկու անգամ նա և Մհեր Ենոքյանը փախուստի մեջ են գտնվել) գարեջուր են խմել միասին: Գարեջուրն ազատության հուշն է իր համար»:

Հիշեցնենք, որ իրանահպատակ ադրբեջանցու սպանության համար  ցմահ ազատազրկման դատապարտված Սողոմոն Քոչարյանը, ով տառապում է նաև  սրտի իշեմիկ հիվանդությամբ ու չի կարողանում քայլել, նստել, նորմալ սնվել, անընդհատ ցավազրկողների ազդեցության տակ է:

 

Զարուհի Մեժլումյանը, ով հուզված էր, հավելեց, որ այսօր հակասական զգացմունքներ ունի, քանի որ մի կողմից ծայրաստիճան  ուրախ է Սողոմոն Քոչարյանի համար, մյուս կողմից՝ տխուր, որ այդ ազատությունը նրան տրվեց ծանր հիվանդ վիճակում:
 

«Փաստորեն մարդուն ազատություն են տվել, բայց չի կարողանում այն վայելել»,-մեկնաբանեց իրավապաշտպանը:
 

Հիշեցնենք, որ Սողոմոն Քոչարյանի կինը մահացել էր, իսկ դուստրը մեկ տարի առաջ ինքնասպանություն էր գործել, և երբ մայրը Սողոմոնին տեղեկացրել է դատարանի որոշման մասին, նա ասել էր. «Գոնե մեկ տարի առաջ լիներ, աղջիկս ինքնասպանություն չէր գործի»:


Սա, հիշեցնենք, ցմահ ազատազրկման դատապարտվածի պատժի կրումից ազատման առաջին դեպքն է:
 

Զարուհի Մեժլումյանը կարծում է, որ դժվարն առաջին դեպքն է, երբ պետք է սառույց կոտրվի և հույս ունի, որ այս վճռին կհետևեն ցմահ ազատազրկվածների վաղաժամկետ ազատման կամ արդարացման հիմքով դատավճիռներ: