Ղազախստանն իր շուրջն անվտանգության գոտի է ստեղծում. Независимая газета
Ղազախստանի նախագահ Նուրսուլթան Նազարբաևը հոկտեմբերի 25-26-ին պաշտոնական այցով կլինի Քաթարում։
Ինչպես տեղեկացնում է Независимая газета-ն, Քաթարի էմիր Թամիմ բին Համադ բին Խալիֆա ալ-Թանիի հետ հանդիպման ընթացքում կքննարկվեն միջազգային օրակարգին առնչվող հարցեր՝ մասնավորապես Սիրիայում հակամարտության կարգավորմանը, ինչպես նաև Քաթարի ներդրումային հիմնադրամի՝ ղազախական ենթակառուցվածքային նախագծերում ներառվելու հեռանկարներին առնչվող հարցեր:
Փորձագետները կարծում են, որ Նազարբաևը կարող է Քաթարի Էմիրին հասցնել Մոսկվայի դիրքորոշումը սիրիական հարցում:
«Ղազախստանի ղեկավարը լրջորեն ակտիվացրել է արտաքին քաղաքական գործունեությունը: Ղազախստանի հիմնական նպատակն է դեպի մեր երկիր ներդրումների հոսքի ապահովումն ու երկրի շուրջ անվտանգության օղակի ստեղծումը»,- լրագրողներին հայտնել է երկրի նախագահի մամուլի խոսնակ Դաուրեն Աբաևը:
Նա նշել է, թե Քաթարից վերադառնալուց հետո Նազարբաևն Աստանայում կընդունի Ճապոնիայի վարչապետ Սինձո Աբեին ու ԱՄՆ պետքարտուղար Ջոն Քերիին:
Ավելի ուշ պաշտոնական այցով կլինի Միացյալ Թագավորությունում, Հյուսիսային Իռլանդիայում ու Ֆրանսիայում:
«Մենք ակտիվացնում ենք և՛ տնտեսական բաղադրիչը, և՛ անվտանգությանն առնչվող հարցերը, քանի որ ընդհանուր առմամբ իրավիճակը տարածաշրջանում այնքան էլ կայուն չէ»,-ասել է Աբաևը։










