Սիրիական ընդդիմությունը մեղադրել է ռուսական ավիացիային ավելի քան 200 խաղաղ բնակչի մահվան համար

Սիրիայի ընդդիմադիրների և հեղափոխական ուժերի ազգային կոալիցիան հայտարարել է, որ ռուսական ավիացիայի ավիահարվածների հետևանքով երկրում ավելի քան 200 խաղաղ բնակիչ է սպանվել։

Նման տվյալներ է հրապարակել Associated Press գործակալությունը` հղում անելով ՄԱԿ-ում ընդդիմության ներկայացուցիչ Նաջիբ Գադբանին։ Նրա տեղեկությունով` սեպտեմբերի 30-ից ի վեր ՌԴ-ի ավիացիոն ուժերը հարվածներ են հասցրել ավելի քան 297 անգամ:

«Սիրիական քաղաքացիական պաշտպանությունը» նշել է, որ այդ ժամանակահատվածում մահացել է 436 խաղաղ բնակիչ։
 

«Այդ մահերի կեսից ավելին ռուսական հարձակումների հետևանքն է»,- հայտարարել է ՄԱԿ-ի ներկայացուցիչը:

Ընդ որում` Գադբանը նշել է, որ Ռուսաստանի գործողությունները Սիրիայում ուղղված են սիրիական «չափավոր» ընդդիմությանը վերացնելուն, ոչ թե ԻՊ-ի գրոհայիններին, ինչպես այդ մասին հայտարարում են Ռուսաստանում։