«Իսլամական պետությանն» անդամակցել ցանկացող ռուս ուսանողուհին ընդունել է մեղքը

14:39 • 29.10.15

Մոսկվայի Լոմոնոսովի անվան պետական համալսարանի ուսանողուհի Ալեքսանդրա Իվանովան (Վարվարա Կարաուլովա), որը փորձել էր անդամակցել «Իսլամական պետություն» ահաբեկչական խմբավորմանը, ընդունել է մեղքը։ Այդ մասին հայտնել է նրա փաստաբան Ալեքսանդր Կարաբանովը։

 

Ինչպես տեղեկացնում է РИА Новости գործակալությունը, ահաբեկչական խմբավորմանն անդամակցելու համար աղջկան մինչև 10 տարվա ազատազրկում է սպառնում, սակայն քննության հետ համագործակցության շնորհիվ նրա պատիժը հնարավոր է մեղմել։

 

«Նա ցուցմունք է տալիս, պատասխանում է բոլոր հարցերին, և կարծում եմ, որ փախչելու տեղ չունի, իսկ մեղքն արդեն ընդունել է։ Իմ տակտիկան այն է, որ պետք է համագործակցել քննության հետ»,-ասել է պաշտպանը։

 

Կարաբանովը հավելել է, որ մտադիր է եռօրյա ժամկետում բողոքարկել իր պաշտպանյալի կալանավորման որոշումը։

 

ԻՊ-ին անդամակցել փորձած Մոսկվայի պետական համալսարանի ուսանողուհու գործը մեծ աղմուկ է բարձրացրել Ռուսաստանում։

 

Երկրորդ կուրսի ուսանողուհին, որը տարվել էր իսլամի ուսումնասիրությամբ ու արաբերեն սովորելով, ծնողներից գաղտնի անձնագիր էր ձեռք բերել և մայիսի 27-ին մեկնել էր Ստամբուլ։


Արդեն հունիսի 4-ին նա ձերբակալվել էր թուրք-սիրիական սահմանին՝ Քիլիս քաղաքում։ Նա եղել էր ռուսներից բաղկացած 14 հոգանոց խմբում։ Ավելի ուշ Իվանովան Ինտերպոլի ու թուրքական միգրացիոն ծառայության աշխատակիցների ուղեկցությամբ հասել էր Մոսկվա։