Կրեմլում մեկնաբանել են Սիրիայում ռազմական արշավի հետ A321 օդանավի աղետի կապը

Ռուսաստանի նախագահի մամուլի քարտուղար Դմիտրի Պեսկովը հայտարարել է, որ հարկավոր չէ կապել Եգիպտոսում «Կոգալիմավիա» ավիաընկերության Airbus A321 ինքնաթիռի աղետը Սիրիայում ՌԴ գործողության հետ, գրում է lenta.ru-ն:

«Դրա վերաբերյալ ինչ-որ հիպոթետիկ ենթադրությունները տեղին չեն: Եվ հետո, դրանք բոլորովին տարբեր չափումներ են, բոլորովին տարբեր հարցեր: Պետք չէ դրանք կապել»,- ասել է Կրեմլի պաշտոնական ներկայացուցիչը՝ մեկնաբանելով հարցը, թե կարո՞ղ է ազդել սիրիական արշավի ընթացքի վրա ուղևորատար ինքնաթիռի աղետի այնպիսի վարկածի հաստատումը, ինչպիսին ահաբեկչությունն է:

Դրա հետ մեկտեղ Պեսկովը նշել է, որ դեռ ոչ մի տեղեկություն չկա այն մասին, թե կան արդյոք այդ միջադեպում ահաբեկչության նշաններ։

Շարմ էլ Շեյխ-Սանկտ Պետերբուրգ չվերթն իրականացնող ինքնաթիռը կործանվել է Սինայի թերակղզու օդային տարածքում` թռիչքից 23 րոպե անց։ Հայտնի է, որ 217 ուղևորով և 7 հոգանոց անձնակազմով ինքնաթիռը պայթել է օդում։