Կործանված A321-ի պարամետրային ինքնագրիչը վերծանվել է. «Ռոսավիացիա»

«Ռոսավիացիայի» ղեկավար Սերգեյ Ներադկոն հայտարարել է, որ Սինայի թերակղզում կործանված А321 ինքնաթիռի պարամետրային ինքնագրիչը վերծանվել է, ձայնային տեղեկություններ պարունակող ինքնագրիչը վնասվել է, սակայն այն հնարավոր կլինի վերծանել առաջիկայում. հաղորդում է ТАСС-ը։

«Ձայնային ինքնագրիչը, որը ձայնագրում է անձնակազմի անդամների խոսակցությունն օդաչուների խցիկում, որոշակիորեն վնասվել է, սակայն հնարավոր է վերծանել առաջիկայում»,-ասել է Ներադկոն։

Նա պատմել է, որ ինքնաթիռի մնացորդներից մոդելի ձևավորումը կտևի մի քանի ամիս։ Դաշտային աշխատանքներին զուգահեռ շարունակվում է հետաքննությունը։

«Երբ ստացվեն վերլուծության նյութերը, հետաքննող հանձնաժողովը պետությունների ներկայացուցիչների հետ կվերլուծի ավիացիոն գործունեության ողջ համակարգը։ Դա երկարատև աշխատանք է և կտևի մի քանի ամիս»,-հավելել է Ներադկոն։

Հիշեցնենք, որ հոկտեմբերի 31-ին Շարմ էլ Շեյխից Սանկտ Պետերբուրգ թռչող ինքնաթիռը, որը պատկանում էր «Կոգալիմավիա» ավիաընկերությանը, կործանվել է Սինայի թերակղզում։ Դրանում եղած 217 ուղևորներն ու անձնակազմի 7 անդամները զոհվել են։