Շոկոլադն ավելի խելացի է դարձնում և բարելավում է ուղեղի աշխատանքը. հետազոտություն

Ամերիկացի հոգեբան Մերիլ Էլիասի 40-ամյա ուսումնասիրությունը թույլ է տալիս ենթադրել, որ շոկոլադը դրական է անդրադառնում ուղեղի մի շարք ճանաչողական գործառույթների վրա:

Ինչպես հայտնում է The Independent-ը` Էլիասը փորձն սկսել է 1970-ականներին Նյու Յորքում` հետևելով 1000 մասնակիցների  սննդակարգին, շոկոլադի օգտագործման չափաբաժնին, ինչպես նաև դրա ազդեցությանը արյան ճնշման և ուղեղի ակտիվության վրա:

Ուսումնասիրելով ստացված տվյալները`  հետազոտողները պարզել են, որ ամեն շաբաթ կանոնավոր շոկոլադ օգտագործողների մոտ առավել ակտիվ է գլխուղեղի վերադաս գործառույթը, քան նրանց մոտ, ովքեր ավելի հազվադեպ են շոկոլադ օգտագործել:

Շաբաթական կանոնավոր շոկոլադ ուտելով` մարդկանց մոտ բարելավում է հիշողությունն ու մտածողությունը:

Գիտնականները դեռ չեն պարզել, թե ինչպես է շոկոլադը նման ազդեցություն ունենում ուղեղի աշխատանքի վրա, սակայն նախկին հետազոտություններն արդեն ցույց էին տվել, որ ֆլավանոլով հարուստ սննդատեսակները, որոնցից է նաև շոկոլադը, բարելավում են ուղեղի աշխատանքը: