Իսպանիայում 600 կգ հնագույն հռոմեական մետաղադրամներ են հայտնաբերվել

Իսպանիայի հարավում շինարարները 600 կգ քաշով հին հռոմեական մետաղադրամներ են հայտնաբերել ջրատար խողովակներ տեղադրելիս: 

Ինչպես գրում է The Guardian-ը` Սևիլյայի հնագիտական թանգարանի ղեկավարը հայտնաբերված իրերն «ինքնատիպ հավաքածու» է անվանել: «Նման հայտնագործությունները բավականին հազվադեպ են», - ասել է Աննա Նավառոն:

Բրոնզե մետաղադրամները թվագրվում են 3-րդ դարի վերջին և 4-րդ դարի սկզբին:

Մետաղադրամները հայտնաբերվել են 19 հռոմեական սափորների մեջ՝ իսպանական Տոմարոս քաղաքում: Գանձի ստույգ արժեքը դեռ չի որոշվել, սակայն Նավառոյի խոսքով` այն մի քանի միլիոն եվրո կարժենա:

Մետաղադրամների վրա դրված են Մաքսիմիան և Կոնստանտին կայսրերի կնիքները: Սակայն մետաղադրամները, կարծես, շրջանառության մեջ չեն դրվել, քանի որ դրանք մաշվածության հետքեր չունեն: